講題：活水之道 The Way of Living Water
經課：約翰福音4章5至42節
講員：李均熊牧師
場合：香港中文大學崇基學院禮拜堂主日崇拜
日期：2026年3月8日
耶穌同撒瑪利亞婦人談道，我相信是一個大家都好熟識嘅故事。正因為這個原因，我今天又再嘗試以另外的一些角度去重述這個在約翰福音的記載。而我今日選擇的視角，是和這個婦人住在同一城巿，亦即撒馬利亞地區中，敘加城的居民，希望透過他們的理解。去重新給我們新鮮的角度去思考耶穌和這一個撒瑪尼亞婦人在井旁談道，對我們今日的意思。不過開始之前，讓我交待一下，在三代經課中的甲年，福音經課都主要都是選馬太福音，所以有我們又會叫馬太年，但由大齋期第二主日的，到大齋期第五主日的，福音經課均是選用約翰福音的經文，而且這些經文都是記載耶穌與某人的相遇。上星期大齋期第二主日，在夜間、於耶穌在耶路撒冷過節的時候，一位德高望重的法利賽人去探問耶穌，今天大齋期第三主日則是耶穌在正午、在井旁，與一個曾有四個丈夫，但現在和她一起的卻不是她丈夫的撒瑪利亞婦人相遇。下主日第四主日，則是耶穌在西羅亞池附近遇見一個生來瞎眼的人，使他重見光明；最後在大齋期第五主日，則耶穌在墳地中與拉撒路和他的家姐相遇。這個設計其實很有心思，不過今天沒有幾會詳談。有些在復活節與行洗禮儀節的教會，有時會用福音經課的篇排，來顯示受洗者由疑惑到相信到復活的靈性旅程。也可以值得我們參考下，尤其由上星期尼歌德慕那份黑夜查問耶穌，到完結時仍未知他的信心狀況，到今日係正午耶穌主動引導井旁婦人，至使敘加城的居民承認耶穌就是全人類的救主，顯出信仰歷程的多種可能性。
以下是以撒瑪利亞敘加城居民視角重述約翰福音 4:5–42的記載：
朋友，
我唔係耶穌、唔係門徒、唔係當日同耶穌談話嘅撒瑪利亞婦人。
我係敘加城裡嘅其中一個人——
就係個啲經常被視為「背景人物」嗰種人。可能你有時都會有種咁嘅感覺，就係你唔係主角，係世界呢盤大棋中只係一個普普通通唔起眼嘅普通路人甲乙丙。
但我想話俾你知——
嗰日，井邊發生嘅事，
當初改變嘅唔止係嗰個女人，就係連我哋全城嘅人都被卷入當中嘅改變。
而家，等我由我嘅角度，
講返嗰件令我哋全城震撼嘅事出嚟。
我哋城入面每個人都識得佢。
你哋叫佢「撒瑪利亞婦人」又或者「井旁的女人」(都唔知點解福音書無記載佢個名)
但我哋叫佢「嗰個女人」，甚至更唔好聽嘅稱呼……
講真，
佢係我哋城裡最唔想遇見嘅人。
感情史複雜、名聲唔好、
講佢兩句都唔會有人幫佢講好說話。但其實我哋都知，佢係一個苦命嘅女人，係我哋生活嘅日子，一個女人無咗男人的依靠，根本就生存唔到。佢年輕時應該都係一般女仔咁，好早結婚，但係佢同時間好早做咗寡婦。佢無一般女士咁樣守寡，好快又結婚，可惜個男人對佢唔好，成日話佢腳頭唔好，克死以前個丈夫，最後仲因為小小事就休咗佢。之後我諗佢可能都試咗幾次婚姻，我都唔知佢結過幾次婚，最後佢應該對男人無乜希望，依家跟咗個肯包養佢嘅有婦之夫，叫做生活有啲保障，唔使去做「個行」。但係佢就成為咗敘加城居民茶餘飯後嘅話柄，而家我哋諗返轉頭，果陣時冇憐憫佢嘅不幸，反而仲喺佢嘅傷口里面加鹽，真係有啲唔啱……
咁呢個敘加城居民對佢嘅睇法，佢自己都知，所以佢總係揀正午去打水——
嗰個最熱、最冇人會出現嘅時候。
但嗰日完全唔同。
佢冇再避開人，
佢跑返嚟搵我哋！
仲大聲喊住話：「你哋嚟睇吓——我遇見咗一個人！」
我哋當時嘅反應係：
「咩事？佢又攪咗啲咩嘢？」
「跑成咁，即係點？」
但，佢雙眼發光……
嗰份興奮、嗰種自由、嗰份毫無隱藏嘅勇氣——
我哋從未見過。
佢以前係避世嘅，
但今日佢係衝住世間嚟去做見證。
朋友，
你有冇見過一個人突然變得「好自由」？
自由到你都唔認得佢？又好似好熟識，變到好陌生？
嗰一刻，我哋就係咁。
佢氣喘喘咁同我哋講：
「有一個人……
將我以前嘅事全部講晒出嚟……
但佢唔係嫌棄我，
佢係接納我、理解我……
難道佢就係基督？」
你知唔知，
佢講「我以前所做嘅事」，
我哋全城都知佢講緊乜。而且口中講嘅基督，係唔單止猶太人，亦係我哋撒瑪亞人祈盼上主要派嚟係我哋而家不堪境況拯救我哋嘅救主。係方面，呢個女人特別虔誠，我哋基利心山嘅聖殿無耶路撒冷嗰個咁多規限，所以好似佢咁嘅女人，都可以係我哋嘅聖殿供獻。佢突然話有個知哂佢一齊嘅人，仲要係基督，我哋都好疑惑。
但佢講嘅時候，
佢唔再羞愧。
佢冇再閃避。
佢面容甚至帶住啲光。
以前嘅佢，怕人講。
今日嘅佢，生命好似被打開咗咁。
有啲人開始竊竊私語：
「……究竟發生咩事？」
「佢遇到邊個？」
「邊個可以令一個人變成咁？」
而我心裡面嘅問題係：
「究竟佢遇到個基督點能夠使佢有咁大改變？」
於是，我哋決定親自去睇——到底佢講嘅係真定假」
我哋其實唔係好完全信佢。
佢人生咁多問題，
突然咁熱情、聽日又唔知會點。
但佢嗰份「被觸動」嘅真實，
係假唔到。
於是我哋話：
「不如自己走去睇吓。」
然後，我就見到佢——
坐喺井邊嘅耶穌。
佢睇住我哋，
唔係用猶太人平時睇撒瑪利亞人嘅厭惡眼神；
而係用一種好似對住朋友嘅目光咁望向我哋——
我後嚟都有問返嗰個女人，問佢你見到個猶太男人同你講嘢你唔驚㗎咩？佢同我講，佢行到井邊發現個男人時，其實想即刻拎起個水罐走開，但個男人突然問佢攞水飲，於是佢先至停落嚟，一來出於好奇，二來呢個男人有求於佢，佢畀人拒絕得多，所以都想幫吓佢，於是問咗佢一句，「你既是猶太人，怎麼向我一個撒馬利亞婦人要水喝呢？」點知佢同呢個佢後嚟知道叫耶穌嘅猶太人嘅對話就越嚟越離奇。開頭耶穌同佢講會可畀佢活水，佢以為佢講緊佢知道係邊度有個水泉，啲水會流動嘅「活」水，咁若果耶穌話畀佢聽邊度有個咁嘅活泉，咁佢就唔使咁辛苦日日為咗避開啲人正午過嚟打水。但耶穌突然叫佢叫自己個丈夫過埋嚟，佢就打打咗個突，無細想之下回咗句「我無丈夫」，點知耶穌就將佢以住有五個丈夫，而家同佢係一齊嘅唔係佢丈夫嘅呢啲事講哂出嚟。聽到呢度，我見佢唔再無掩飾自己嘅過去，羞恥被翻轉成見證。故事無變，但說故事的人變咗。就好似佢將個水罐留咗係井旁咁，同時將過去嘅羞愧留咗係井旁，留咗係耶穌身邊。而佢裏面就有活水流出嚟。點解我咁清楚佢留咗個水罐係井旁？因為耶穌離開咗敘加之後，佢有一次嚟問我借水罐用，話佢個日之後搵唔返個水罐。我有問佢點解會留底咗個水罐係井旁，佢就話其實有兩個答案，一係其實佢真係唔記得，因為佢嗰刻個心好亂、好興奮，好似有人心入面打開咗扇窗，好似有陣風湧咗入嚟，就一時唔記得咗個水罐，後嚟返到城裏面，見到大家一齊出去搵耶穌嘅時候，佢就覺得其實留低水罐好似係一個記號—我嚟井旁係為咗裝水；離開時，生命入面有耶穌所賜嘅活水。我以前靠個罐、靠自己揹水返屋企；而家—我可以唔再靠嗰啲去解渴。所以，忘記同釋放，其實一齊發生；耶穌嘅釋放，就發生喺人最自然嘅反應入面。你以為係唔記得，其實係放低咗。咁我就問，咁你又問我借水罐用？佢話係因為活水唔會取代責任。我仍然打水、煮飯、做人；但我而家唔係靠水罐維生，係靠基督賜嘅活水活著。— 我會還番個罐，亦會繼續講我點樣遇見基督。佢咁講，我好似明白多咗：屬靈經歷唔係逃離生活，而係更新生活。活水＝心裡的泉源；水罐＝日常的責任。兩者係並行嘅。
後嚟耶穌同我哋講咗好多，
但有一句我一世唔會忘記——
「救恩係畀全世界嘅。」
唔再分猶太、撒瑪利亞，
唔再分男人、女人、好人、壞人、正常人、失敗人。
祂看穿我哋，
但冇一句責備，
只有接納、只有邀請。
我終於明白——
嗰個女人點解改變得咁快。
佢見到嘅耶穌，
原來我哋都需要。
佢嗰份自由、嗰份光亮、嗰份無需再掩飾嘅勇氣，
原來就係「活水」嘅果效
耶穌講嘅「活水」，
唔係淨係畀佢——
係畀我哋每一個城裡嘅人。
我哋城裏嘅好多時自以為比呢個女人好、
比呢個女人乾淨、
比呢個女人幸福安定。
但其實，
呢個女人比我哋更早「嚐到」真正嘅恩典。
我哋擁有禮儀、擁有傳統、擁有對神嘅知識，
但佢擁有一樣嘢——
她真誠地承認自己的口渴。
而耶穌最先回應嘅，
就係真心承認自己心靈「乾渴」嘅人。
起初，我哋因為佢嘅見證而去；
後來，我哋親自聽見耶穌。
最後，我哋只能講一句：
「祂唔單止係妳嘅救主，
祂係我哋全城嘅救主。」
佢生命被翻轉，
原來係為咗讓我哋一齊被翻轉。
佢留下水罐，
原來係要提醒我哋：
我哋城裡每個人都有自己揹住嘅水罐。
耶穌能解佢嘅渴，
就能解我哋嘅渴。
而嗰日我明白嘅係：
原來被改變嘅，不止佢一個。
耶穌係嚟改變我哋全部。
朋友，你嘅「視角」係咩？
今日，
喺你生命裡，
你可能以為自己係「旁觀者」、
係「故事以外嘅人」、
係「只係聽別人見證嘅人」。
但我想對你講：
城裡人都可以遇見耶穌。
你都可以被活水觸動。
你都可以講出你嘅一句——
『祂真係我嘅救主。』
